یوکرین کی کابینہ نے ایک اہم فیصلہ کرتے ہوئے ایسی قرارداد منظور کر لی ہے جس کے تحت مقامی اور بین الاقوامی شراکت داروں کو حقیقی جنگی ڈیٹا پر اے آئی ماڈلز کی تربیت کی اجازت دی جائے گی۔ یوکرین کے وزیر دفاع میخائیلو فیڈوروف کے مطابق یہ دنیا کا پہلا اقدام ہے جس میں فعال جنگ کے دوران حاصل ہونے والا ڈیٹا اے آئی ڈویلپمنٹ کے لیے کھولا جا رہا ہے۔
اس مقصد کے لیے یوکرین کی وزارت دفاع کے اندر ایک محفوظ پلیٹ فارم قائم کیا گیا ہے جہاں شراکت دار ادارے ڈیٹا تک رسائی حاصل کر سکیں گے۔ اس پلیٹ فارم میں ہزاروں مشنز سے حاصل شدہ ڈرون فوٹیج اور دیگر جنگی معلومات شامل ہیں جنہیں پہلے ہی یوکرین کے DELTA ٹارگٹنگ سسٹم میں استعمال کیا جا رہا ہے۔
حکام کے مطابق اس ڈیٹا کو خاص طور پر اینوٹیشن اور تجزیے کے ساتھ تیار کیا گیا ہے تاکہ اے آئی ماڈلز کو حقیقی جنگی حالات میں بہتر فیصلے کرنے کی تربیت دی جا سکے۔ اس سے خودکار ڈرونز، ٹارگٹنگ سسٹمز اور دیگر دفاعی اے آئی ٹیکنالوجیز کو زیادہ مؤثر بنانے میں مدد مل سکتی ہے۔
وزیر دفاع فیڈوروف نے اس منصوبے کو “ون ون” قرار دیا ہے۔ ان کے مطابق اتحادی ممالک کو ایسی جنگی ڈیٹا تک رسائی ملے گی جو عام حالات میں دستیاب نہیں ہوتا، جبکہ یوکرین خود بھی اس تعاون کے ذریعے خودکار ہتھیاروں اور اے آئی پر مبنی دفاعی نظام کو تیزی سے ترقی دے سکے گا۔
ماہرین کا کہنا ہے کہ حقیقی میدانِ جنگ کا ڈیٹا اے آئی ماڈلز کے لیے انتہائی قیمتی ہوتا ہے کیونکہ اس میں وہ پیچیدہ حالات شامل ہوتے ہیں جو عام ٹریننگ ڈیٹا میں نہیں ملتے۔ اسی وجہ سے یہ اقدام مستقبل میں اے آئی پر مبنی جنگی حکمت عملیوں کو تیزی سے تبدیل کر سکتا ہے۔
یہ تحریر اے آئی کی دنیا کے فیس بک پیج پر پوسٹ کی گئی ہے
