(پینتیس اقساط پر مشتمل سریز جو بچوں اور نئے سیکھنے والوں کو انتہائی آسان انداز میں اے آئی کی دنیا سے متعارف کرائے گی)
قسط نمبر 5: سپر وائزڈ لرننگ کیا ہے؟
گزشتہ قسط میں ہم نے جانا کہ مشین لرننگ کیا ہوتی ہے اور کیسے مشینیں تجربے سے سیکھتی ہیں۔آج ہم مشین لرننگ کی ایک خاص اور دلچسپ قسم پر بات کریں گے، جس کا نام ہے: سپر وائزڈ لرننگ۔
فرض کریں ایک بچہ نیا نیا الف بے سیکھ رہا ہے۔ استاد اسے ہر حرف دکھاتا ہے، نام بتاتا ہے اور کئی مرتبہ دہراتا ہے: یہ الف ہے، یہ بے ہے، یہ پے ہے۔ بچہ ہر حرف کو دیکھتا ہے، سنتا ہے اور سمجھتا ہے کہ کون سا نشان کس حرف کے لیے ہے۔اگر بچہ غلطی کرے تو استاد فوراً درست کر دیتا ہے۔
یہی طریقہ سپر وائزڈ لرننگ میں بھی ہوتا ہے — ایک استاد جیسی رہنمائی۔
سپر وائزڈ لرننگ میں مشین کو نہ صرف ڈیٹا دیا جاتا ہے بلکہ ہر ڈیٹا کے ساتھ صحیح جواب (یعنی لیبل) بھی مہیا کیا جاتا ہے۔
مثلاً اگر ہم ایک مشین کو جانوروں کی پہچان سکھا رہے ہوں تو ہم اسے ہر تصویر کے ساتھ بتاتے ہیں کہ "یہ بلی ہے"، "یہ کتا ہے"، "یہ خرگوش ہے"۔
مشین ان جوڑوں کو بار بار دیکھتی ہے: تصویر + صحیح جواب۔
اور یوں وہ سیکھ جاتی ہے کہ کس طرح مختلف خصوصیات کو دیکھ کر فیصلہ کرنا ہے کہ تصویر میں کیا ہے۔
یہ طریقہ بالکل ویسا ہے جیسے ابتدائی جماعتوں کے بچوں کو الفابیٹس، نمبرز، رنگوں یا جانوروں کے نام سکھائے جاتے ہیں۔شروع میں بچے کو ہر چیز الگ الگ اور واضح طور پر سکھانی پڑتی ہے تاکہ وہ ذہن میں ٹھیک ٹھیک فرق بٹھا سکے۔
سپر وائزڈ لرننگ کے تحت مشین ایک "ماڈل" بناتی ہے۔یعنی وہ ایسا فارمولا یا ذہنی نقشہ تیار کر لیتی ہے جس کے ذریعے وہ نئے، پہلے کبھی نہ دیکھے گئے ڈیٹا پر بھی صحیح پیش گوئی کر سکتی ہے۔مثلاً اگر ایک بار مشین نے ہزاروں تصاویر سے سیکھ لیا کہ بلی کیسا دکھتی ہے، تو اب اگر نئی تصویر سامنے آئے تو بغیر مدد کے بھی بلی کو پہچان لے گی۔
یہی وجہ ہے کہ سپر وائزڈ لرننگ کے ذریعے ہی آج دنیا کے بہت سے "سمارٹ سسٹمز" کام کرتے ہیں۔آپ کے موبائل پر چہرہ پہچاننے والی تکنیک، ای میل میں اسپیم فلٹر، یا آن لائن شاپنگ سائٹس پر آپ کو پسند کی چیزیں دکھانے والی تجاویز — یہ سب سپر وائزڈ لرننگ کا نتیجہ ہیں۔
یاد رکھیے، سپر وائزڈ لرننگ میں سب سے اہم چیز ہوتی ہے: اچھا اور درست ڈیٹا۔
اگر مشین کو غلط مثالیں دی جائیں تو وہ بھی غلط سیکھے گی، بالکل ویسے ہی جیسے بچے کو اگر شروع سے الف بے غلط سکھائی جائے تو اسے سدھارنے میں بہت وقت لگے گا۔
آج کی قسط میں ہم نے سیکھا کہ سپر وائزڈ لرننگ کیسے ایک استاد اور شاگرد کی طرح کام کرتی ہے — جہاں مشین کو واضح مثالوں سے تربیت دی جاتی ہے تاکہ وہ درست نتائج اخذ کر سکے۔
اگلی قسط میں ہم جانیں گے ایک نیا دلچسپ طریقہ جس میں مشین خود اپنے دماغ سے گروپس بناتی ہے: اَن سپر وائزڈ لرننگ۔
یہ تحریر اے آئی کی دنیا کے فیس بک پیج پر پوسٹ کی گئی ہے۔ اس کی تمام اقساط آپ (#AiKiDuniyaKidsSeries) ہیش ٹیگ پر کلک کر کے پڑھ سکتے ہیں۔
