(پینتیس اقساط پر مشتمل سریز جو بچوں اور نئے سیکھنے والوں کو انتہائی آسان انداز میں اے آئی کی دنیا سے متعارف کرائے گی)
قسط نمبر 13: ٹیسٹنگ کیا ہوتی ہے؟
گزشتہ قسط میں ہم نے سمجھا کہ ٹریننگ کے ذریعے مشینیں کیسے بار بار مشق کر کے سیکھتی ہیں اور اپنے اندازوں کو بہتر بناتی ہیں۔
آج ہم ایک اور نہایت اہم مرحلے پر بات کریں گے: ٹیسٹنگ۔ یعنی جب مشین کی تربیت مکمل ہو جائے تو اسے کیسے پرکھا جاتا ہے کہ وہ واقعی سیکھ گئی یا نہیں۔
سوچیے کہ آپ نے کئی دنوں تک سائیکل چلانے کی مشق کی ہے۔اب استاد کہتا ہے:
"چلو اب تم ایک بڑی سڑک پر سائیکل چلاؤ اور دیکھیں کہ تم نے کتنا سیکھا ہے۔"
یہ جو بڑی سڑک پر حقیقی دنیا میں اپنی مہارت دکھانا ہے، یہی دراصل ٹیسٹنگ ہے۔
مشین لرننگ میں بھی جب مشین کو ٹریننگ مکمل کرا دی جاتی ہے تو اب وقت آتا ہے کہ اسے نئے ڈیٹا پر آزمایا جائے۔ایسا ڈیٹا جو مشین نے پہلے کبھی نہیں دیکھا ہوتا۔
تاکہ یہ پرکھا جا سکے کہ مشین نے صرف یاد کیا ہے یا واقعی سمجھا ہے۔
ٹیسٹنگ میں مشین کو نئے سوالات یا تصاویر دی جاتی ہیں۔
پھر دیکھا جاتا ہے کہ مشین صحیح جواب دیتی ہے یا نہیں۔
اگر مشین زیادہ تر صحیح جواب دے تو سمجھا جاتا ہے کہ ماڈل اچھا بنا ہے۔
اگر مشین بار بار غلطیاں کرے تو معلوم ہو جاتا ہے کہ ٹریننگ میں کہیں کمی رہ گئی ہے یا ڈیٹا درست نہیں تھا۔
ٹیسٹنگ کا مقصد یہ ہوتا ہے کہ مشین کی "اصلی کارکردگی" کا اندازہ لگایا جا سکے۔
ایسا نہیں کہ مشین کو صرف انہی سوالات پر نمبر دیے جائیں جو اس نے یاد کیے ہوں، بلکہ نئے، اجنبی سوالات پر جانچا جائے کہ وہ خود سے کیسے جواب دیتی ہے۔
یہ بالکل ویسا ہے جیسے آپ کے اسکول میں سال کے آخر میں ایک امتحان لیا جاتا ہے۔
استاد پرچے میں وہ سوالات بھی شامل کرتا ہے جو آپ نے کتاب میں پڑھے ہیں، اور کچھ ایسے بھی جو سوچنے پر مجبور کرتے ہیں۔تاکہ یہ دیکھا جا سکے کہ آپ نے صرف رٹا تو نہیں لگایا بلکہ واقعی سمجھا بھی ہے یا نہیں۔
ٹیسٹنگ کے دوران بعض اوقات "اکیوریسی" یعنی درستگی کا حساب لگایا جاتا ہے۔
مثلاً اگر مشین کو 100 تصویریں دی گئیں اور اس نے 90 تصویریں صحیح پہچانیں، تو اس کی اکیوریسی 90٪ کہی جائے گی۔یہ اعداد و شمار ماڈل کی کامیابی یا ناکامی کا پتہ دیتے ہیں۔
لیکن ایک اہم بات یاد رکھنی چاہیے:صرف اچھے نمبرز کافی نہیں ہوتے، بلکہ یہ بھی دیکھا جاتا ہے کہ مشین کب، کہاں اور کیوں غلط ہو رہی ہے۔کیونکہ اصل مقصد مشین کو نہ صرف ہوشیار بنانا ہے بلکہ اسے سمجھ دار اور محتاط بنانا ہے۔
آج کی قسط میں ہم نے سیکھا کہ ٹیسٹنگ وہ مرحلہ ہے جہاں مشین کو اصل دنیا کے نئے چیلنجز دیے جاتے ہیں اور پرکھا جاتا ہے کہ اس نے سچ میں سیکھا یا محض رٹا مارا ہے۔
اگلی قسط میں ہم ایک اور اہم مسئلے پر بات کریں گے: اگر مشین بہت زیادہ رٹ لے اور ہر چیز حرف بہ حرف یاد کر لے تو کیا ہوتا ہے؟یعنی ہم سمجھیں گے اوور فٹنگ کا مفہوم۔
یہ تحریر اے آئی کی دنیا کے فیس بک پیج پر پوسٹ کی گئی ہے۔ اس کی تمام اقساط آپ (#AiKiDuniyaKidsSeries) ہیش ٹیگ پر کلک کر کے پڑھ سکتے ہیں۔
