عام لوگ کیا سوچتے ہیں؟
ایک تازہ سروے میں امریکہ میں ایک دلچسپ تصویر سامنے آئی ہے۔ کمپنیوں کے سربراہان اور سرمایہ کار اے آئی کے بارے میں چاہے کتنے پرجوش ہوں، عام لوگ اب بھی اس ٹیکنالوجی کو احتیاط، خدشے اور بہت سے سوالات کے ساتھ دیکھ رہے ہیں۔
یہ نیا ڈیٹا “جسٹ کیپیٹل” کے سروے سے سامنے آیا ہے، جس میں تین بڑے گروہوں سے رائے لی گئی
عام عوام
کاروباری رہنما
سرمایہ کار
نتیجہ حیران کن بھی ہے اور حقیقت پسندانہ بھی۔
عوام کی اکثریت مانتی ہے کہ اے آئی آگے جا کر معاشرے پر مثبت اثر ڈالے گی، مگر پھر بھی ان کے ذہن میں ایک بنیادی خوف موجود ہے۔ انہیں فکر ہے کہ کہیں یہ ٹیکنالوجی بچوں کے تحفظ کو متاثر نہ کرے، کہیں جعلی ویڈیوز اور ڈیپ فیکس سچ اور جھوٹ کے درمیان کی لکیر نہ مٹا دیں، اور کہیں معلومات کی جنگ میں عام آدمی نہ پس جائے۔
دوسری طرف کاروباری دنیا کا فوکس یکسر مختلف ہے۔ انہیں سب سے زیادہ فکر اس بات کی ہے کہ اے آئی سے ان کی کمپنی کی پیداوار کتنی بڑھے گی اور سرمایہ کاری کا نتیجہ کیا نکلے گا۔ یعنی اصل سوال یہ ہے کہ اس ٹیکنالوجی کا فوری فائدہ کہاں ہے۔
دلچسپ بات یہ ہے کہ ایک بہت بڑا مشترکہ نکتہ بھی سامنے آیا ہے۔ تینوں گروہوں میں سے اکثریت کا خیال ہے کہ اس دور میں سب سے زیادہ سرمایہ “امریکی کارکن” پر لگنا چاہیے۔ یعنی تربیت، نئی مہارتیں، اور اے آئی کے ساتھ کام کرنے کی صلاحیت۔ امریکہ کی ایک بڑی مثال وال مارٹ ہے جس نے اپنے ملازمین کی تربیت پر مسلسل کام کر کے ایک الگ مقام بنا لیا ہے۔
نئی نسل بالخصوص “جین زی” میں خوف بڑھ رہا ہے کہ اگلے چند برس میں کہیں اے آئی ان کی نوکری نہ چھین لے۔ لیکن تحقیق یہ بھی بتاتی ہے کہ جس شخص نے خود اے آئی استعمال کرنا شروع کر دیا اس کے خدشات کم ہو جاتے ہیں۔ شاید اسی لیے ماہرین کہتے ہیں کہ خوف کا بہترین علاج سیکھنا ہے۔
ریگولیشن کا معاملہ بھی امریکی معاشرے میں اہم بحث بن چکا ہے۔ بڑی کمپنیوں سے لے کر عام عوام تک بیشتر لوگ چاہتے ہیں کہ حکومت کچھ نہ کچھ کردار ضرور ادا کرے، لیکن سوال یہ ہے کہ ایسا طریقہ کیا ہو جو غلطیوں کو روکے بھی اور جدت کو دباتا بھی نہ ہو۔ یہی وہ نازک توازن ہے جس پر امریکہ کی پوری پالیسی کھڑی ہے۔
سروے میں ایک اور دلچسپ نتیجہ یہ سامنے آیا کہ عوام اب بھی کاروباری رہنماؤں پر اعتماد رکھتے ہیں کہ وہ اے آئی کو ذمہ داری کے ساتھ آگے بڑھائیں گے۔ شاید اسی اعتماد کی وجہ سے اسٹیک ہولڈر ماڈل، یعنی وہ سوچ جس میں کمپنی صرف منافع نہیں بلکہ اپنے ملازمین اور صارفین کے لیے بھی بہتری لاتی ہے، آج بھی اپنی جگہ برقرار رکھے ہوئے ہے۔
کہانی کا خلاصہ یہ ہے کہ اے آئی امید بھی ہے اور امتحان بھی۔ کاروباری دنیا اسے ترقی کا اگلا دروازہ سمجھ رہی ہے، جبکہ عوام چاہتے ہیں کہ یہ دروازہ کھلے تو سہی، مگر حفاظت کے ساتھ۔
یہ تحریر اے آئی کی دنیا کے فیس بک پیج پر شیئر کی گئ ہے۔
